ست الشاى
العطا على العطا - البركل
الاهداء : -
الى كل النساء فى بلادى ..
والى ستات الشاى ستات الستات لحدهن ..
الزينبات والعائشات والفاطمات ..
القسمه واخواتها كلتوم وحنان وثريا
واخواتهن من جم وبلا فرز ...
من حاربن الحوجه بى حمو النيران و كافن الشر بالشرار وهبدن الهم بالهبود ..
(( ست الشاى ))
يومى على الله .. ليل ونهار
سارح بالى يجيب ويودى
ما مليت من التكرار
انا متيقنة بى احوالى
وكيف متصالحه مع الاقدار
حال الدنيا ..
الايام الفيها شويه
الاعمار الفيها قصار
رحمو الله السر كان طيب
وزول مو هين وكلو اسرار
كان متيقن وزول مترحمن
كان شغال فوق كارو حمار
ماسك خشمو ولاب يتكلم
عمرو السر ماكان ثرثار
يومو المات وصانى كتيير
من اسرارو ادانى اسرار
ووصى ولادو وصايا كتاار
اوعه تفكرو فى حق زول
حق الناس يا اولادى انا ضار
وامسكو قوى بس فى حق الله
وحق الام
وراعو ولادى حقوق الجار
يوم السر اتشهد وصنه
البيت صنه
واصبح صنى زى الاثار
مافى شى فيهو بلا الايمان
ومافى شى عندى بلا الاصرار
ماهميت بى يدى الواحده
وانو اولادى الليله صغار
هم الهم خليتو على الله
هم ترباتن وهم تعليمن والايجار
جدول صبرى متمسح سرسر
من فوق تقتنتو كاب سرسار
والسوق سايق والحال واقف
المتحركة هى الاسعار
راس الخيت عند السبابه
والخياته مع التجار
السر.. ربنا يعدل قداميتو فات
يرحمو الله الزوج البار
مانقنقت وراهو بتاتا
وماقنبت ادق فى الطار
سارحه افكر
وانا منسجمه مع الافكار
قلت اجرب زى الارضه
زى ماجربت الحجار
عسى ولعل القالى دباره
لى اولادى اسوى عمار
انا ساسقت على كم مهنة
لا جخ فاضى ولا بوبار
سنة للحول انا ابيع فى القش
احلف اقول فد يوم ما بار
اخر الدور صفقت ايديا
اكلو قروشى اهل الابقار
فيهن اعاين بى عين قلبى
شيل الحق يعمى الابصار
حقى عفيتو انا عفو لله
ولا اتاسفت على الشىء الصار
اتوكلت عليك يا الله
دبر حالى انا يا دبار
ستة شهور صاقرت الصاج
وعاد لاحوله من العسكار
الاذان قبال مايأذن
سبعة صوانى املاها كسار
لا كليته ولا مليته
اخر شى واخر الاخبار
صاحب المطعم كيف حيرنى
يومى على الله يجيبلو اعذار
مره السوق بقى ميت خالص
الشغال شغال سمسار
لو ما دخل قرش اب يفطر
عادى بيقعد دون افطار
باقى الناس تفطر بالبوش
موية فول بى زيت وشمار
الصياغ يفطرو بى سلطه
طماطم ودكوه وبصل و خيار
عرفت شغلتو معاى مابتنفع
انا خليتو عشان جبار
حتى هو ذاتو عفيتو انا لله
والعفو لله بقالى جدار
الله مخير فينا جميعا
وليهو الخيره هو في ما اختار
شلت النبق المدرسه يوم
وقصب السكر حق سنار
ساعه يضرب جرس الفسحه
يجوا جارين الطلبه كتار
ماما ثريا ادينى نبق
خالتو ثريا ادينى فشار
يا الله من زمن الحاجى
زمن الحاجى زمن حقار
فيهن واحد ماقال شىء
فيهو احترت وعقلى احتار
من نظراتو عرفتو يتيم
قلبى اتقطع ولع نار
ساعة اديتو نبق فى كيس
ابا مايمسكو بى اصرار
قدر حنستو انا واترجيتو
قلبت كلامى معاهو هظار
فيك ياولدى ملامح عامر
واكتر حاجه شبه عمار
خته الكيس فى محلو وفات
فى ضرا حيطه وراء الاشجار
من الشنطة مرقلو تمر
ياكل وماشى على الازيار
اعاين فيهو انا حيلى اتهده
وجبل القدره الفيى انهار
انا طارت لى شغلة المدرسه
لما معاهو صوابى انا طار
اتوضيت وقعدت اصلى
بعد سبحت قريت ازكار
بقيت افكر اسوى شنو
وماكان عندى انا غير اختار
عشان اولادى احمد ومريم
والتيمان عامر وعمار
اصلى حلفت لحقت زلفت
مهما زمانى على انا جار
عزة نفسى انا خطاً احمر
وحد الله مابين العار
انا اخترت اكون ست شاى
فطن السوق والزيى كتار
انا بيناتن فى سوق الله
بس تلزمنى تلات ا متار
ودستة كبابى وزى كم بمبر
وجردل مويه وكانون نا ر
عقاب طربيزة قديمة تكركب
ساند حيله فرد مسمار
انا متحكره طول اليوم
والبوخ لاوى والحمو حار
مشدوه بالى مع الكفتيره
وبين بن يقلى وحس شاى فار
واسمعه سمع الوسوسه فوقى
وياما وياما سمعت حوار
ما اهتميت بالقالو على
همى اتم باقى المشوار
ويا الله من نظرات ناس
فارضه على يوماتى حصار
وانا فى الفيها
وكل ما شوشو يدى بخار
وحد ما افوط انا كباية
وامسح صفره ملانه غبار
كل ما وشيى يتملى هبود
وحد ما انطاير فوقى شرار
قدام عينى يمر السر
ياهو السر الفيهو اسرار
اشوفو يسالم فى اولادو
يعاين فيهن كبرو كبار
مريم سستره زينه سماحه
وفرحان انو احمد طيار
والتيمان اتخرجو هندسه
ماشاء الله عامر وعمار
والاولاد صاقعين لابوهم
يابا نقولك قولا سار
كلنا نحن قرينا الجامعه
كلنا كنا اولاد شطار
امنا يابا وراك كم صبرت
وبقت الام والابو فى الدار
تقع وتقوم والله براها
متلا اكنها كم تنفار
يومه ال تشترى رطلين سكر
زى الجابت كم قنطار
تصرف صرفته فى الصندوق
الاموال دى تشوفه كتار
تمرق تمشى تجيب الموز
منو تقسم تدى الجار
مريم تحكى تقول لابوها
يابا ابوى انا عندى شمار
امى وراك ماختت حنه
ولا سوتلها زيت كركار
غير الجمعه ويوم العيد
امى تقول الريحه بزار
منو وليا بقيت ازغرد
وجارى دموعى جرى الامطار
حس زغريدى المارق منى
متلا اكنو مرق من غار
لمن شفت اولادى وابوهم
جنب البيت جابو الدفار
عاد لا حوله العفش النقلو
قفاف وشنط مردومه غبار
لساتك الكارو
مناجل القش
وصاج الكسره
السبعه صوانى متل ماهن
وكزلك كان حق قصب السكر
باقى نبق من زمن المدرسه
وباقى فشار
وكم طوريه وكم فرار
اخر يوم الليله ونرحل
برى برى تانى من الايجار
مريم بتى تصور وتبكى
ملت تلفونه صور تذكار
اول مره اعرف السر
شاعر ويكتب فى الاشعار
ساعه جابو سريرى انا مارق
والسر يكتب فى مسدار
انا هللت
انا كبرت
انا كترت الاستغفار
احمد الله لقيتو مرادى
انو اولادى بنولن دار
منقة صبرى قدر مو شايلى
تانى هى نورت النوار
تعبى الكان داك كلو نسيتو
يوم الليله جنيتو ثمار
وقت لاولادى
باكر كلمو ناس الحله
واال يجى مار
انا فى الجامع يوم الجمعه
مسوى كرامه زلابية وشاى
والعصرية انا فطن البيت
جايبى النوبه وجايبى الطار
ومن الليلى انا بالى انجمه
واخر شىء واخر الاخبار
احمد الله واشكر فضلو
حمد ماعندو عدد ومقدار
انا فى الدنيا دى شفت الجنه
حالتى انا كنت مصاقرى النار